Jak żech była małom dziołszkom, radach patrzała na mame i Ome przy robocie w kuchni. Pamiyntom dobrze, wiela sie musiały nastarać, żeby kożde jodło wszystkim smakowało. Kuchnia woniała roztomańtymi ziołami, a one, w fortuchach, z warzechami w rynkach, smakowały zołzy, miynsa i zupy. Starka godali, że w dobrze namiyszanych korzyniach zawarty je cołki smak kożdego jodła. Nieroz próbowałach podpatrzyć i dopytać, co Starka dodowali do jedzynio, ale Oni godali mi yno, że troszka soli, ciutka korzynio, ciutka tego i tamtego i dużo przonio.
