Nudle jodało sie u nos nie yno od świynta, ale i na beztydziyń. Mama przeważnie dowała nudle do zupy, ale czasym warziła je, odcedzała, a po tym polywała zołzom abo śmietonkom i posypowała cukrym – to był gibki łobiod. Nieroz jedlimy go przy robocie. Pamiyntom, że fater zjodoł wszystko nojgobciyj, a potym sie śmioł, że jak nie bydymy wartko jeść, to jeszcze nasze nom z talyrzy pozjodo. W naszej chałpie, w spiżarce, stoła biksa ze swojskimi nudlami. Czasym, jak nie było nic inkszego do zmaszkecynio, podbieralimy go po troszce (żeby mama nie poznała) i jedli jak czipsy abo paluszki.
